കൂട്ടുകാർ പച്ച മാങ്ങ കടിച്ചു തിന്നുന്നത് കാണുമ്പോൾ നമ്മുടെ വായിൽ വെള്ളമൂറുന്നത് എന്തുകൊണ്ടാണ്?

കൂട്ടുകാർ പച്ച മാങ്ങ കടിച്ചു തിന്നുന്നത് കാണുമ്പോൾ നമ്മുടെ വായിൽ വെള്ളമൂറുന്നത് എന്തുകൊണ്ടാണ്?

അയൽപക്കത്തെ കൂട്ടുകാരൻ പച്ച മങ്ങയോ പച്ചപ്പുളിയോ കടിച്ച് തിന്നുമ്പോൾ മാത്രമല്ല,  അതിനങ്ങേപ്പുറത്തെ  വല്യമ്മ മീൻ വറുക്കുന്നതിന്റെ മണം കിട്ടുമ്പോഴും ചിലപ്പോൾ സ്കൂളിലെ ഉച്ചമണി മുഴങ്ങുമ്പോഴുമൊക്ക  നമ്മുടെ വായിൽ വെള്ളമൂറും. മനുഷ്യരിലും മറ്റ് ചില ജീവികളിലും കാണുന്ന മുന്നനുഭവങ്ങൾ മൂലമുള്ള അനൈച്ഛിചേഷ്ടകളാണ് കാരണം.

പച്ചമാങ്ങ കടിച്ച് തിന്നുമ്പോൾ നമ്മുടെ വായിൽ വെള്ളമൂറാറുണ്ട്. പച്ച മാങ്ങ മാത്രമല്ല. പുളിയും മധുരവും ഉള്ള ഏത് വസ്തുക്കൾ തിന്നുമ്പോഴും വായിൽ വെള്ളമൂറും. പച്ചമാങ്ങ തിന്നാതിരിക്കുമ്പോഴും, പച്ചമാങ്ങ കടിച്ച് തിന്നുമ്പോഴത്തെ  അനുഭവം തലച്ചോറിന് ഓർമ ഉണ്ടാവും. തത്ഫലമയി ഭക്ഷണത്തെ കുറിച്ച് ചിന്തിക്കുമ്പോഴും  മറ്റുള്ളവർ ഭക്ഷണം കഴിക്കുന്നത് കാണുമ്പോഴും തലച്ചോറിന്,  ഭക്ഷണത്തെ കുറിച്ചുള്ള നാഡീ  സന്ദേശങ്ങൾ ലഭിക്കും. അപ്പോൾ ഭക്ഷണം വായിലെത്തിയാൽ  സംഭവിക്കുന്നതുപോലെ വായിൽ ഉമ്മിനീർ സ്രവിച്ച് തുടങ്ങുന്നു. പച്ചമാങ്ങ, പച്ചപ്പുളി എന്നിവ കടിച്ച് തിന്നുമ്പോൾ സാധാരണയിൽ കൂടുതൽ ഉമിനീർ ഊറുന്നത് നമുക്ക് അനുഭവമാണല്ലോ.  അതുകൊണ്ട് ഈവക സാധനങ്ങൾ മറ്റാരെങ്കിലും കടിച്ച് തിന്നുമ്പോഴും നമ്മുടെ വായിൽ വെള്ളമൂറുന്നു. ഏതെങ്കിലും ഒരു പ്രേരണയോട് നമ്മുടെ ശരീരത്തിന് സ്വാഭാവികമായി ഉള്ള പ്രതികരണത്തെ തുടർച്ചയായ അനുഭവത്തിലൂടെ അഥവാ പരിശീലനത്തിലൂടെ മറ്റൊരു പ്രേരണയുമായി ബന്ധപ്പെടുത്താനുള്ള തലച്ചോറിന്റെ കഴിവാണ് ഇതിന് കാരണം.