ചെവിയും ശരീരസന്തുലനവും തമ്മിൽ ബന്ധമുണ്ട് എന്നു പറയുന്നത് എന്തുകൊണ്ടാണ്?

ചെവിയും ശരീരസന്തുലനവും തമ്മിൽ ബന്ധമുണ്ട് എന്നു പറയുന്നത് എന്തുകൊണ്ടാണ്?

ഉൾച്ചെവിയിൽ നടക്കുന്ന ചില പ്രവർത്തനങ്ങൾ നമ്മുടെ ശരീരത്തിലെ സന്തുലനം നിലനിർത്തുന്നതിന് സഹായകമായി വർത്തിക്കുന്നത് കൊണ്ടാണ് ഇപ്രകാരം പറയുന്നത്. ഇതേക്കുറിച്ച് മനസ്സിലാക്കുന്നതിന് ചെവിയുടെ ഘടനയെയും പ്രവർത്തനത്തേയും കുറിച്ച് മനസ്സിലാക്കേണ്ടതുണ്ട്. ചെവിക്ക് പ്രധാനമായും മൂന്ന് ഭാഗങ്ങളാണുള്ളത്.  ബാഹ്യകർണം,  മധ്യകർണം, ആന്തരകർണം എന്നിങ്ങനെ ഇവയെ വിളിക്കാം. ബാഹ്യകർണവും മധ്യകർണവും ശബ്ദതരംഗങ്ങളെ ആന്തരകർണത്തിലേക്ക്  നയിക്കുന്നു. ഇവിടെ എത്തിച്ചേരുന്ന ശബ്ദതരംഗങ്ങൾ ശ്രവണ അറയിലെ ദ്രാവകങ്ങളിൽ അലകൾ സൃഷ്ടിക്കുന്നു. ഈ അലകൾ ദ്രവത്തിൽ മുങ്ങിയിരിക്കുന്ന സിരാഗ്രങ്ങളിൽ വൈദ്യുത വേഗങ്ങൾ സൃഷ്ടിക്കുന്നു. ഇങ്ങനെ സൃഷ്ടിക്കപ്പെടുന്ന വൈദ്യുത വേഗങ്ങളെ തലച്ചോറ് സ്വീകരിക്കുകയും വ്യാഖ്യാനിക്കുകയും ചെയ്യുമ്പോഴാണ് നാം ശബ്ദം കേൾക്കുന്നത്.
ലാബിറിന്തിനകത്ത് ഒരു സന്തുലന അറ  ഉണ്ട്. ഈ അറയിൽ നിറഞ്ഞിരിക്കുന്ന ദ്രവ്യത്തിന് ചലനം ഉണ്ടാവുമ്പോഴും വൈദ്യുതാവേഗം സൃഷ്ടിക്കപ്പെടും. പ്രസ്തുത ആവേഗം സിരാഗ്രന്ഥങ്ങളിലൂടെ തലച്ചോറിൽ എത്തി വ്യാഖ്യാനിക്കപ്പെടുമ്പോഴാണ് നമുക്ക് ചലനത്തെ കുറിച്ചും സന്തുലനത്തെക്കുറിച്ചും  ധാരണ ആകുന്നത്. സന്തുലനത്തിൽ എന്തെങ്കിലും വ്യത്യാസം വരുത്തേണ്ടതുണ്ട് എങ്കിൽ തലച്ചോറ് ആ വിവരം ശരീരപേശികളെ  അറിയിക്കുകയും സന്തുലനം നിലനിർത്താൻ വേണ്ട ക്രമീകരണങ്ങൾ നടത്തുകയും ചെയ്യുന്നു.