ഇന്ത്യയിലെ ആദ്യത്തെ വെള്ളത്തിനടിയിലെ മെട്രോ എവിടെയാണ് സ്ഥിതിചെയ്യുന്നത്?

ഇന്ത്യയിലെ ആദ്യത്തെ വെള്ളത്തിനടിയിലെ മെട്രോ എവിടെയാണ് സ്ഥിതിചെയ്യുന്നത്?

ഹൗറയെയും കൊൽക്കത്തയെയും തമ്മിൽ ബന്ധിപ്പിക്കുന്ന ഹൂഗ്ലി നദിക്കടിയിയിലൂടെ കടന്നു പോകുന്ന മെട്രോ ആണ് ഇന്ത്യയിലെ ആദ്യത്തെ അണ്ടർവാട്ടർ റെയിൽവേ. 2016 ഏപ്രിൽ 14-നാണ് നിർമ്മാണം ആരംഭിച്ചത്. 16.6 കിലോമീറ്റർ വരുന്ന മെട്രോയുടെ 10.8 കിലോമീറ്ററും ഭൂമിക്കടിയിലൂടെ ആണ് കടന്നു പോകുന്നത്. 502 മീറ്റർ ദൂരമാണ് ഹൂഗ്ലി നദിക്കടിയിയിലൂടെ ഉള്ളത്.

          

കൊൽക്കത്ത മെട്രോ റെയിൽ കോർപ്പറേഷൻ ലിമിറ്റഡിന് വേണ്ടി അഫ്‌കോൻ ട്രാൻസ്ടണൽസ്റ്റോറി എന്ന കമ്പനിയാണ് ടണൽ നിർമ്മിച്ചത്. സാൾട്ട് ലേക് മുതൽ ഹൗറ സ്റ്റേഷൻ വരെയാണ് ദൈർഘ്യം. സാൾട്ട് ലെക് സെക്ടർ 5 മുതൽ ഇത് ഉപരിതല ഉയർന്ന പാതയിലൂടെയും സാൾട്ട് ലെക് സ്റ്റേഡിയം മുതൽ ഹൗറ വരെ ഭൂഗർഭപാതയിലൂടെയും ആണ് ഇത് ആസൂത്രണം ചെയ്തിരിക്കുന്നത്. ഈ ദൗത്യം 2021-ഓടുകൂടി പൂർത്തിയാകുമെന്നാണ് കരുതപ്പെടുന്നത്. 2035-ഓടെ കൂടി ദിവസേന 10 ലക്ഷം യാത്രക്കാർക്ക് യാത്രചെയ്യാൻ ആവുംവിധം ഈ മെട്രോയെ ഒരുക്കുമെന്നാണ് കരുതുന്നത്. 80 കിലോമീറ്റർ വേഗതയാണ് ഈ മെട്രോ ട്രെയിനിന്റെ പരമാവധി വേഗത. പുതിയ ഒരുതരം അനുഭവമായിരിക്കും ഇതിലൂടെ യാത്ര ചെയ്യുമ്പോൾ യാത്രക്കാർക്ക് ലഭിക്കുന്നത്.

*ആരോഗ്യത്തെ സംരക്ഷിച്ചുപോരുന്ന അമ്പത് ആയുർവേദസൂക്തികൾ --

*ആരോഗ്യത്തെ സംരക്ഷിച്ചുപോരുന്ന അമ്പത്  ആയുർവേദസൂക്തികൾ -- 
================================================
*അജീർണ്ണേ ഭോജനം വിഷം*
(പ്രാതൽ ദഹിയ്ക്കുംമുമ്പ് കഴിച്ച ഉച്ചയൂണും, ഉച്ചയൂണു ദഹിയ്ക്കുംമുമ്പ് കഴിച്ച അത്താഴവും വിഷമാണ്.)

*ഹാലാ ഹാലാഹലോപമാ*
(രൂക്ഷമദ്യം വാസുകി ഛർദ്ദിച്ച വിഷം പോലെ മാരകം)

*അർദ്ധരോഗഹരീ നിദ്രാ*
(പാതി രോഗം ഉറങ്ങിയാൽ തീരും)

*മുദ്ഗദാളീ ഗദവ്യാളീ*
(ചെറുപയർ രോഗം വരാതെ കാക്കും.  മറ്റു പയറുകളുടെ ദോഷം ചെറുപയറിനില്ല.)

*ഭഗ്നാസ്ഥിസന്ധാനകരോ രസോനഃ*

(വെളുത്തുള്ളി ഒടിഞ്ഞ എല്ലിനെ കൂട്ടിച്ചേർക്കും)

*അതി സർവ്വത്ര വർജ്ജയേൽ*

(ഒന്നും അമിതമായി കഴിയ്ക്കരുത്, ചെയ്യരുത്, ഉപഭോഗിയ്ക്കരുത്)

*നാസ്തി മൂലം അനൗഷധം*

(ഔഷധഗുണം ഇല്ലാത്ത ഒരു സസ്യവും ഇല്ല)

*ന വൈദ്യ: പ്രഭുരായുഷ*:

(വൈദ്യൻ ആയുസ്സിന്റെ നാഥനല്ല.).

*മാതൃവത് പരദാരാണി*

(അന്യസ്ത്രീകളെ അമ്മയായിക്കാണണം  )

*ചിന്താ വ്യാധിപ്രകാശായ*

(മനസ്സുപുണ്ണാക്കിയാൽ ശമിച്ച രോഗം പുറത്തുവരും)

*വ്യായാമശ്ച ശനൈഃ ശനൈഃ*

(വ്യായാമം ക്രമമായി മാത്രം   വർദ്ധിപ്പിയ്ക്കണം. ..ധൃതിപ്പെടാതെ ചെയ്യണം -- അമിതവേഗം പാടില്ല.)

*അജവത്  ചർവ്വണം കുര്യാത്*

(ആഹാരം നല്ലവണ്ണം -- ആടിനെപ്പോലെ -- ചവയ്ക്കണം. ഉമിനീരാണ്, ആദ്യത്തെ ദഹനപ്രക്രിയ)

*സ്നാനം നാമ മനഃപ്രസാദനകരം ദുസ്സ്വപ്നവിദ്ധ്വംസനം*

(കുളി വിഷാദം മാറ്റും, പേക്കിനാക്കളെ പറപറത്തും)

*ന സ്നാനം ആചരേത് ഭുക്ത്വാ*

(ഊണുകഴിഞ്ഞയുടനെ കുളി പാടില്ല.  ദഹനം സ്തംഭിയ്ക്കും)

*നാസ്തി മേഘസമം തോയം*

(മഴവെള്ളം പോലെ ശുദ്ധമായ വേറെ വെള്ളം ഇല്ല.)

*അജീർണ്ണേ ഭേഷജം വാരി*

(തെറ്റിയ ദഹനത്തെ വെള്ളം  ശരിയാക്കും..വെള്ളം കുടിച്ച് ഉപവസിക്കുക...)

*സർവ്വത്ര നൂതനം ശസ്തം  ..*
*സേവകാന്നേ പുരാതനേ..*

(എല്ലാറ്റിലും പുതിയതാണ് നല്ലത്, നെല്ലരിയുടെയും  വേലക്കാരുടെയും കാര്യത്തില്‍  ഒഴികെ_)


*നിത്യം സർവ്വ രസാഭ്യാസ:*

(ദിവസവും ആറ്  രസവും ചേർന്ന ഭക്ഷണം കഴിക്കണം -- ഉപ്പ്, കയ്പ്പ്, മധുരം, എരിവ്, പുളിപ്പ്, കഷായം )

*ജഠരം പൂരയേദർദ്ധം അന്നൈ:*

(ആഹാരം കൊണ്ട് വയറിന്റെ പാതിമാത്രം നിറയ്ക്കുക -- ബാക്കിയിൽ കാൽഭാഗം വെള്ളം, ബാക്കി ശൂന്യം )

*ഭുക്ത്വോപവിശതസ്തന്ദ്രാ*

(ഉണ്ടിട്ട് ഇരുന്നാൽ ക്ഷീണം വരും -- ഉണ്ടാൽ അരക്കാതം നടക്കുക )

*വൃദ്ധസ്യ തരുണീ വിഷം*

(വയസ്സന് യുവതിയുമായുള്ള ലൈംഗികബന്ധം വിഷോപമമാണ്).

*ക്ഷുത് സ്വാദുതാം ജനയതി*

(വിശപ്പ്  രുചി വർദ്ധിപ്പിക്കും -  Hunger is the best sauce.)

*ചിന്താ ജരാണാം*

(ചിതയും ചിന്തയും വ്യത്യസ്തമല്ല..
ചിത ശരീരത്തെ ദഹിപ്പിക്കും..ചിന്ത ജീവിതത്തെയും..)

(മനസ്സു പുണ്ണാക്കുന്നത് ജരയെ ത്വരിപ്പിയ്ക്കും -- Worrying ages men and women.)

*ശതം വിഹായ ഭോക്തവ്യം*

(നൂറു കാര്യം ഒഴിവാക്കിയിട്ടെങ്കിലും ഊണ് കൃത്യസമയത്തു കഴിയ്ക്കണം. )

*സർവ്വധർമ്മേഷു മദ്ധ്യമാം*

(എല്ലാറ്റിലും ഇടയ്ക്കുള്ള വഴിയേ പോകുക -- Via media is the  best)

*നിശാന്തേ ച പിബേത് വാരി:*

(ഉണർന്നാലുടൻ ഒരു വലിയ അളവ് പച്ചവെള്ളം കുടിയ്ക്കണം.  മലബന്ധം ഒഴിയും, ശരീരത്തിലെ toxins കഴുകിക്കളയും)

*വൈദ്യാനാം ഹിതഭുക് മിതഭുക് രിപു:*

(ഹിതാഹാരം മിതമായിക്കഴിയ്ക്കുന്നവൻ  വൈദ്യന്റെ ശത്രു -- കാരണം, അവനു രോഗം വരില്ല. രോഗമില്ലാതെ വൈദ്യനെന്തു വരുമാനം ?)

*ശക്യതേऽപ്യന്നമാത്രേണ*
*നര: കർത്തും നിരാമയ:*

(ആഹാരം മാത്രം ക്രമീകരിച്ചു രോഗങ്ങളില്ലാതെയാക്കാം.)

*ആരോഗ്യം ഭാസ്കരാദിച്ഛേത്*

(രോഗം വന്നാൽ പ്രാർത്ഥിയ്ക്കേണ്ട ദേവത സൂര്യൻ)

*ദാരിദ്ര്യം പരമൗഷധം*

(ദാരിദ്ര്യത്തിൽ പല രോഗങ്ങളും മാറും.  അതായത്, അമിതഭക്ഷണത്തിൽ നിന്നും വ്യായാമക്കുറവിൽനിന്നും അമിതസുഖഭോഗത്തിൽ നിന്നുമാണ്, രോഗങ്ങൾ ജനിയ്ക്കുന്നത്)

*ആഹാരോ മഹാഭൈഷജ്യമുച്യതേ*

(ആഹാരമാണ് മഹാമരുന്ന്)

*രുഗബ്‌ധിതരണേ ഹേതും*
*തരണീം ശരണീകുരു !*

(രോഗത്തിന്റെ കടൽ കടക്കാൻ സൂര്യനെ വന്ദിയ്ക്കുക.  തരണി = സൂര്യൻ (വള്ളം എന്നും അർത്ഥമുണ്ട്.  ഇവിടെ ശ്ലേഷപ്രയോഗം...ധരണി(ഭൂമി) എന്ന പ്രയോഗവും തെറ്റല്ല )

*സുഹൃർദ്ദർശനമൗഷധം*

(സ്നേഹിതരെക്കണ്ടാൽ രോഗത്തിന് ആശ്വാസം വരും. Healing power of love and friendship.)

*ജ്വരനാശായ ലംഘനം*

(പനിയുണ്ടെങ്കിൽ ഉണ്ണരുത് )

*പിബ തക്രമഹോ നൃപ രോഗഹരം*

(ഹേ, രാജാവേ, മോരു കുടിയ്ക്കൂ -- രോഗം മാറും. പാലിലും വെണ്ണയിലും മറ്റുമുള്ള കൊഴുപ്പു മോരിലില്ല, അവയിലെ മറ്റെല്ലാ ഗുണങ്ങളും ഉണ്ടുതാനും.)

*ന ശ്രാന്തോ ഭോജനം കുര്യാത്*

(തളർന്നിരിയ്ക്കുമ്പോൾ ഉണ്ണരുത്.)

*ഭുക്ത്വോപവിശത:  സ്ഥൗല്യം* 

(ഉണ്ടിട്ടു നടന്നില്ലെങ്കിൽ  തടിയ്ക്കും) 

*ദിവാസ്വാപം ന കുര്യാത്*

(പകലുറങ്ങരുത് -- കാരണം, മേദസ്സു കൂടും, രാത്രിയിലെ ഉറക്കം തടസ്സപ്പെടും,)

*ലാഭാനാം ശ്രേഷ്ഠമാരോഗ്യം*

(ഏറ്റവും മുന്തിയ നേട്ടം -- ആരോഗ്യം.  അതിനുവേണ്ടി മറ്റെല്ലാം കൈവെടിയണം)

*സർവ്വമേവ പരിത്യജ്യ*
*ശരീരം അനുപാലയേത്*
*ശരീരസ്യ പ്രണഷ്ടസ്യ* *സര്‍വമേവ വിനശ്യതി..*

(മറ്റെല്ലാം കൈവിട്ടാണെങ്കിലും ദേഹം കാത്തുരക്ഷിയ്ക്കണം)

*പരിശ്രമോ മിതാഹാരോ*
*ഭൂഗതാവശ്വിനീസുതൗ*

(ആരോഗ്യദേവതകളാണ് -- ഭൂമിയിൽ വന്ന അശ്വിനീ ദേവന്മാരാണ് -- കണക്കിനുള്ള ഊണും, നിത്യവ്യായാമവും.)

*പ്രാണായാമേന യുക്തേന*
*സർവ്വരോഗക്ഷയോ ഭവേൽ*

(ശ്വാസോച്ഛ്വാസം പ്രാണായാമരീതിയിൽ ചെയ്യുന്നവനെ രോഗം ബാധിയ്ക്കില്ല.)

*വിനാ ഗോരസം കോ രസം ഭോജനാനാം ?*

(അൽപ്പം തൈരോ മോരോ ഇല്ലാത്ത ഊണ് ഊണാണോ ?)

*ആരോഗ്യം ഭോജനാധീനം*

(ആരോഗ്യം വേണമെങ്കിൽ എന്ത്, എങ്ങിനെ ആഹരിയ്ക്കുന്നു  ശ്രദ്ധിയ്ക്കുക.)

*ഘൃതേന വർദ്ധതേ  വീര്യം*

(നെയ്യു കഴിച്ചാൽ വീര്യം  കൂടും)

*മിതഭോജനേ സ്വാസ്ഥ്യം*

(ആരോഗ്യത്തിന്റെ അടിസ്ഥാനം അളവു മിതമായ  ആഹാരത്തിലാണ്.)

*സായം പ്രാതർമ്മനുഷ്യാണാം*
*ഭോജനം വേദനിർമ്മിതം*

ഒരു നേരം ഉണ്ണുന്നവന്‍ യോഗി
രണ്ടു നേരം ഉണ്ണുന്നവന്‍ ഭോഗി..
മൂന്നു നേരം ഉണ്ണുന്നവന്‍ രോഗി
നാലു നേരമായാല്‍ ദ്രോഹി..!!

(ഉച്ചതിരിഞ്ഞ് ഒരൊറ്റ ഊണ് -- ഇതാണ് നല്ലത് .  ഭോഗികൾക്കു രണ്ടൂണ് , വേദനിര്‍ദ്ദിഷ്ടമാണ്..  മൂന്നു തവണ ഉണ്ടാൽ  രോഗം വരാം.-- ഇത് പ്രായപൂർത്തിയെത്തിയവർക്കുള്ള ഉപദേശമാണ്. )

*സർവ്വരോഗഹരീ ക്ഷുധാ*

(ഉപവാസം കൊണ്ട് അനവധി രോഗങ്ങൾ മാറ്റാം.  ശരീരത്തിന് സ്വന്തം രോഗനാശന ശക്തിയുണ്ട്.  അത് ഉപവസിയ്ക്കുമ്പോൾ ഉണർന്നു പ്രവർത്തിയ്ക്കും.)

ഇൻഡസ്ട്രിയൽ മെലാനിസം

ഇൻഡസ്ട്രിയൽ മെലാനിസം എന്ന പേരിൽ പരിണാമ ശാസ്ത്രജ്ഞരുടെ ഇടയിൽ പ്രസിദ്ധീയാർജിച്ച പ്രതിഭാസം എന്താണ്?

ചിറകിലെ അല്പമായ ഒരു വർണ്ണ ഭേദം കൊണ്ട് അതിജീവിച്ച ഒരു ശലഭത്തിന്റെ കഥ ആണ് ഇൻഡസ്ട്രിയൽ മേലാനിസം എന്ന പേരിൽ പരിണാമ ശാസ്ത്രജ്ഞർക്ക് പ്രിയപ്പെട്ടതായത്. 1952 ഡിസംബറിൽ ലണ്ടൻ നഗരത്തെ മൂടിയ പുകമഞ്ഞിന്റെ പശ്ചാത്തലത്തിൽ നടന്ന ഒരു അതിജീവനത്തിന് കഥയാണിത്. അന്തരീക്ഷവായു അല്പമായി പോലും മലിനീകരിക്കപ്പെട്ടാൽ അപ്രത്യക്ഷമാവുകയാണ് ലൈക്കനുകൾ. പച്ച നിറമുള്ള ആൽഗകൾ പച്ച നിറമില്ലാത്ത ഫംഗസുകൾക്കുകൂടി ആഹാരം കൊടുക്കാനായി അവയെ ഒപ്പം കൂട്ടുന്നതിൽ നിന്നാണ് ലൈക്കനുകൾ പിറക്കുന്നത്. ലൈക്കനുകൾ പറ്റിയിരിക്കുന്ന മരങ്ങളുടെ പുറംതൊലിക്കു പ്രത്യേകമായൊരു വെളുപ്പുനിറം പകരും. ആ നിറത്തിനോട് സാമ്യതയുള്ള നിറമുള്ള ചിറകുകളും ശരീരവുമുള്ള ചിത്രശലഭങ്ങൾ അതിനാൽ ശത്രു ജീവികളിൽ നിന്നും രക്ഷപ്പെട്ടു പോന്നിരുന്നു. ഈ ശലഭങ്ങൾ മരത്തൊലി ക്ക് മുകളിൽ ഇരുന്നാൽ അവയെ തിരിച്ചറിയുക പ്രയാസമായിരുന്നു. എന്നാൽ വ്യവസായ വിപ്ലവം പരത്തിയ കരിയും പുകയും അടിച്ച് ലൈക്കനുകൾ നശിച്ചു. മരങ്ങൾ പോലും കൽക്കരിയുടെ പുകയിൽ കുളിച്ചു കരിമ്പൂതങ്ങളെ പോലെയായി. അതിലൂടെ മേൽപ്പറഞ്ഞ ശലഭങ്ങൾ ശത്രു ജീവികളുടെ കണ്ണിൽ എളുപ്പത്തിൽ ചെന്നുപെട്ടു.

  

പതിയെ പതിയെ അവയുടെ എണ്ണത്തിൽ ഒരു തിരിച്ചുപോക്ക് അസാധ്യം ആവും വിധം കുറഞ്ഞു. അതേസമയം ഈ ശലഭങ്ങളിൽ ഇടയിൽ തന്നെയുള്ള ചിലത് സ്വതവേ അല്പം കറുപ്പുകലർന്ന ചിറകുകളോടു കൂടിയവയായിരുന്നു. അവയുടെ എണ്ണം ചുരുങ്ങിയ കാലം കൊണ്ട് വർദ്ധിച്ചു വരികയും ചെയ്തു. ഡാർവിന്റെ പരിണാമ സിദ്ധാന്തം ആണിക്കല്ലായി അവതരിപ്പിക്കുന്ന പ്രകൃതിനിർധാരണം അധവാ നാച്ചുറൽ സെലക്ഷൻ എന്ന പ്രക്രിയയുടെ ഏറ്റവും പ്രകടമായ ഉദാഹരണമായാണ് ഇത് കരുതപ്പെടുന്നത്.

ട്രെയിനിൽ അപായ ചങ്ങല വലിക്കുമ്പോൾ ട്രെയിൻ നിൽക്കുന്നതിന്റെ പിന്നിലെ പ്രവർത്തനം എങ്ങനെ ആണ്

ട്രെയിനിൽ അപായ ചങ്ങല വലിക്കുമ്പോൾ ട്രെയിൻ നിൽക്കുന്നതിന്റെ പിന്നിലെ പ്രവർത്തനം എങ്ങനെ ആണ്?

ചങ്ങല വലിച്ചാൽ തീവണ്ടി നിൽക്കില്ല, ബ്രേക്ക് പ്രവർത്തിപ്പിച്ചാൽ മാത്രമേ തീവണ്ടി നിൽക്കൂ. ചങ്ങലയും ബ്രേക്ക് വ്യൂഹവും ആയി ഘടിപ്പിച്ചിട്ടുള്ളതുകൊണ്ടാണ് ചങ്ങല വലിക്കുമ്പോൾ തീവണ്ടി നിൽക്കുന്നത്. തീവണ്ടിയിലെ ബ്രേക്ക്, വാക്വം കൊണ്ടാണ് പ്രവർത്തിക്കുന്നത്; ശരിക്കും പറഞ്ഞാൽ വാക്വം കൊണ്ടാണ് ബ്രേക്ക് വലിച്ചു വീൽ സ്വതന്ത്രമാക്കി വെച്ചിരിക്കുന്നത്. ഈ നിർവാത അവസ്ഥ നഷ്ടപ്പെട്ടാൽ അതായത് വാക്വത്തിൽ വായു കടന്നാൽ ബ്രേക്ക് താനെ വീഴുകയും ചക്രങ്ങൾ ഉരഞ്ഞ് ഉരുളൽ നിലയ്ക്കുകയും ചെയ്യും.

      

ബോഗികൾ തമ്മിൽ ഘടിപ്പിക്കുമ്പോൾ വണ്ടി വലിക്കാൻ ആവശ്യമായ ഭീമൻ കൊളുത്തുകൾക്കു പുറമെ ഓരോ റബ്ബർഹോസ് കൂടി ചേർക്കാറുണ്ട്. ഇതാണ് ഒരറ്റം മുതൽ മറ്റേ അറ്റം വരെ നീണ്ടു പോകുന്ന വാക്വം ലൈൻ.ഈ ബ്രേക്ക് എഞ്ചിൻ ബോഗിയിൽ മാത്രമല്ല, ഓരോ ബോഗിയുടെയും അടിയിലുള്ള ഓരോ ചക്രത്തിലും പ്രവർത്തിക്കും. അപായ ചങ്ങല വലിക്കുമ്പോൾ അപ്പോൾ ഈ വാക്വം ചോരുന്നത് കൊണ്ട് ബ്രേക്കുകൾ താനെ വീഴുകയും തീവണ്ടി നിൽക്കുകയും ചെയ്യുന്നു.

മത്സ്യാഹാരം ഹൃദ്രോഗം തടയും എന്നു പറയുന്നത്തിന്റെ കാരണം എന്ത്?

മത്സ്യാഹാരം ഹൃദ്രോഗം തടയും എന്നു പറയുന്നത്തിന്റെ കാരണം എന്ത്?

മത്സ്യാഹാരം ഹൃദ്രോഗം വരാതെ ഒരളവുവരെ സൂക്ഷിക്കുന്നു. കാരണം ഇത് രക്തത്തിലെ കൊളസ്ട്രോളിന്റെ അളവ് കുറയ്ക്കുന്നതാണ്. മത്സ്യം കൂടുതലായി ഉപയോഗിക്കുന്നവരെ അപേക്ഷിച്ചു പതിന്മടങ്ങ് ഹൃദ്രോഗസാധ്യത മറ്റുള്ളവരിൽ കണ്ടുവരുന്നു. മത്സ്യമോ മത്സ്യ എണ്ണയോ കഴിച്ചാൽ മതിയാകും.

      

രക്തക്കുഴലിന്റെ ഭിത്തിയിൽ കൊളസ്ട്രോൾ അടിഞ്ഞുകൂടി ഉണ്ടാകുന്ന മാറ്റങ്ങളെ തടയുവാൻ ഇവ സഹായിക്കുന്നു. കൊളസ്ട്രോളും ട്രൈഗ്ലിസറൈഡും അടിഞ്ഞുകൂടാൻ  സഹായകമാകുന്നത് ഒരുതരം മാംസ്യം ആണ്. മത്സ്യ എണ്ണ ഈ ലിപ്പോ പ്രോട്ടീനിന്റെ അളവ് (രക്തത്തിൽ) കുറയ്ക്കുന്നു. കൂടാതെ ഉയർന്ന സാന്ദ്രതയുള്ള ലിപ്പോപ്രോട്ടീനിന്റെ അളവ് കൂടുകയും ചെയ്യും. എച്ച് ഡി എൽ കൊളസ്ട്രോൾ നീക്കം ചെയ്യുന്നതിനും സഹായകമാകുന്നു.

     

കൂടാതെ മീൻ എണ്ണയിൽ ഒമേഗ-3 എന്ന പോളിഅപൂരിത കൊഴുപ്പ് അമ്ലം ഉണ്ട്. സസ്യാഹാരം ഭക്ഷിക്കുന്നവർക്ക് പച്ചില വർഗങ്ങളിൽ നിന്നും വളരെ കുറഞ്ഞ തോതിൽ മാത്രമേ ഒമേഗ-3 കൊഴുപ്പ് അമ്ലം ലഭിക്കുന്നുള്ളൂ. വാസ്തവത്തിൽ മത്സ്യങ്ങൾക്ക്  അവയുടെ ആഹാരമായി തീരുന്ന ചെറുസസ്യങ്ങളിൽ നിന്നുമാണ് ഈ വസ്തു ലഭിക്കുന്നത്.

എന്താണ് ചാക്യാർകൂത്ത്?

കേരളത്തിൽ പണ്ട് സാമൂഹിക വിമർശനത്തിനായി ഉപയോഗിച്ചിരുന്ന ഇന്ന് ഒരു കലാരൂപം ആണ് ചാക്യാർകൂത്ത് എന്നു കേട്ടിട്ടുണ്ട്. എന്താണ് ചാക്യാർകൂത്ത്?

പണ്ടുകാലം മുതലേ കേരളത്തിലെ ക്ഷേത്രങ്ങളിൽ ചാക്യാർ സമുദായത്തിൽ പെട്ടവർ പുരാണകഥകളെ ആസ്പദമാക്കി കൂത്ത് പറയുന്ന സമ്പ്രദായമുണ്ട്. സദസ്യരിൽ പുരാണ കഥാപരിജ്ഞാനവും ഭക്തിയും വളർത്തുകയായിരുന്നു ഉദ്ദേശ്യം. സംസ്കൃതപദങ്ങൾ ഉദ്ധരിച്ചു അവയുടെ അർഥം സരസമായി വിശദമാക്കുകയാണ് ചെയ്യാറുള്ളത്.  ചാക്യാന്മാരുടെ ഫലിത പാടവത്തിനനുസരിച്ച് കൂത്തിന് രസമേറും.
കൂത്തു പറയുന്ന ചാക്യാർക്ക് നാട്യശാസ്ത്രം അനുസരിച്ചുള്ള അഭിനയപാടവം വേണം. മുദ്രകൾ കാണിച്ചു ശ്ലോകത്തിലെ അർഥങ്ങൾ വ്യക്തമാക്കണം. അതിനാൽ ദൃഷ്ടിയും ഹസ്തമുദ്രയും എല്ലാം ചാക്യാർ പരിശീലിക്കണം. മിഴാവ് ആണ് കൂത്തിന്റെ പ്രധാന പശ്ചാത്തലവാദ്യം.

         

കൂത്തിന് സാമൂഹികമായ വലിയ പ്രസക്തി ഉണ്ടായിരുന്നു. ഒന്നു സദസ്യരിൽ ആരെയും വിമർശിക്കാനും പരിഹസിക്കാനും കൂത്ത് പറയുന്ന ഘട്ടത്തിൽ ചാക്യാർക്ക് അവസരമുണ്ട്. അത് കഥാ സന്ദർഭത്തിന് യോജിച്ചത് ആകണം എന്നേയുള്ളൂ. ഈ വിമർശനങ്ങളെ സഹിഷ്ണുതയോടെ കാണാൻ സദസ്യരും തയ്യാറായിരുന്നു. നല്ല ചാക്യാന്മാർ  കൂത്ത് അവതരണം സാമൂഹിക വിമർശനത്തിനായി ഉപയോഗിച്ചു. ഇന്നും അമ്പലങ്ങളിൽ ചാക്യാർകൂത്ത് അവതരിപ്പിക്കാറുണ്ട്.

എന്താണ് സീബ്രയുടെ ത്വക്കിന്റെ യഥാർത്ഥ നിറം?

എന്താണ് സീബ്രയുടെ ത്വക്കിന്റെ യഥാർത്ഥ നിറം? വെളുത്ത ത്വക്കിൽ കറുത്ത വരകളോ അതോ കറുത്ത ത്വക്കിൽ വെളുത്ത വരകളോ?

നമ്മുടെ ത്വക്കിന് നിറം നൽകുന്നത് മെലാനിൻ എന്ന പദാർത്ഥമാണ് എന്ന് ഏവർക്കും അറിയാമല്ലോ. മെലാനിൻ അംശം കൂടുതൽ ഉള്ളവർക്ക് കറുത്ത നിറവും മറ്റുള്ളവർക്ക് വെളുത്ത നിറവുമാണ്. ഈ പദാർത്ഥമാണ് ഭീകരമായ അൾട്രാവയലറ്റ് രശ്മികളിൽ നിന്ന് നമുക്ക് സംരക്ഷണം നൽകുന്നത്. ഈ നിലയ്ക്ക് ചിന്തിക്കുമ്പോൾ സിബ്രകളുടെ സ്വാഭാവികമായ നിറം ഏതാണെന്ന് ഏവർക്കും സംശയം തോന്നാം. സീബ്രയുടെ നിറം കറുത്തതാണ്. ത്വക്കിൽ ഉള്ള മെലാനോസൈറ്റെസ് ആണ് മെലാനിൻ എന്ന പദാർത്ഥം ഉൽപാദിപ്പിക്കുന്നത്. സീബ്രയുടെ വെളുത്ത വരകളിൽ  മെലാനോസൈറ്റെസ് നിർജീവം ആണ്.

                 

എന്തുകൊണ്ടാണ് രണ്ട് രീതിയിൽ ഒരേ പദാർത്ഥം പെരുമാറുന്നത് എന്ന് പലർക്കും സംശയം തോന്നിയേക്കാം. ഇത് ശരീരം തണുപ്പിക്കാൻ പരിണാമത്തിന്റെ ഭാഗമായി സിബ്രക്ക് കിട്ടിയതാണ്. കറുത്ത വര കൂടുതൽ പ്രകാശം ആഗിരണം ചെയ്യുന്നതുകൊണ്ട് ആ ഭാഗത്ത് നിറത്തിൻ്റെ തീവ്രത കൂടുന്നു മറുഭാഗത്ത് കുറയുന്നു. ഈ വ്യതിയാനം കാരണം സിബ്രക്കു അവരുടെ പൂർവികരായ കുതിരകളെക്കാൾ 5 ഡിഗ്രിയിൽ കൂടുതൽ ശരീരം തണുപ്പിക്കാൻ സാധിക്കും.